Nan rale mennen vini nou te fè sou parazit lakay zannimo domestik ki kapab lakoz zowonoz, nou te pale de chen ak sestodoz yo ! Men, sou menm sijè sa a, nou pa kapab neglije pale de chat ak toksoplasmoz.
Kisa ki toksoplasmoz la ?
Toksoplasmoz la se yon maladi parazit Toksoplasma gondii lakoz. Parazit sa tèlman piti ke nou pa kapab wè li ak je nou senpman.
Ki bèt ki ka trape li ?
Toxoplasma gondii a se lakay chat la menm li alèz. Nan poupou osinon nan fwotman, parazit la al enstale li lakay moun, bèt ak nan manje. Nap konprann tou ke nan kondisyon sa yo, moun kapab trape maladi a pa sèlman nan kontak avèk chat men tou nan manje vyann bèt osinon plant/ fui ki kontamine,
Lè parazit la lakay bèt la, li vin fòme de kis, Lè vyann yo mal kuit, parazit la nan kis sa yo pa mouri e se nan manje yo kontaminasyon an pral kontinye.
Konsa tou, nou kapab kontamine menm nan pousyè ki genyen parazit la.
Sèl mwayen kontaminasyon moun ak moun yo jwenn nan ka maladi toksoplasmoz la se soti nan manman ale jwenn bebe ki pako fèt la.
Kòman maladi a manifeste lakay chat la ?
Pa konn genyen siy vre maladi a lakay chat apa de ka pwoblèm poumon.
Kòman maladi a manifeste lakay moun ?
Toksoplasmoz la jeneralman pa lakoz gwo pwoblem lakay moun ki byen pòtan. Men li se yon risk pou moun sante yo deja frajil yo tankou moun ki genyen SIDA e sitou timoun ak fanm ansent yo. Lè li rantre nan òganis moun/ bèt la, parazit la ale nan san an epi li gaye nan tout kò a.
Lakay moun byen pòtan yo, se jeneralman grip ak fyèv, fatig epi glann. Lakay medam yo, si gwosès la nan yon stad avanse, li ka lakoz move devlopman je, sèvo bebe a. Sa ka vin lakoz nan kèk ka timoun nan vin gen yon ti reta entèlektyèl. Mete sou sa, bebe a ka genyen lajonis. Men, si se nan kòmansman gwosès la, li kapab menm lakoz fos kouch osinon timoun nan ka fèt tou mouri ; nou jwenn menm ka sa yo lakay bèt ki plenn ki trape parazit la. Se egzamen san osinon tès PCR yo fè pou yo kapab konfime malady toksoplasmoz la.
Kòman yo trete li?
Wi genyen tretman pou toksoplasmoz, an jeneral se medikaman kont bakteri ak parazit ke yo ye. Se doktè apre konfimasyon maladi a ki ap preskri medikaman yo.
Fok nou pran anpil prekosyon lè nap netwaye poupou chat yo, pou nou evite manyen yo ak men nou yon fason pou parazit la ta va poze sou nou. Dezenfektan jeneral pa touye parazit la, si nou gen kote ki te kontamine ak poupou chat, li preferab pou nou netwaye yo ak dlo cho.
Epitou, pou moun ki gade bèt kifè elvaj, kenbe chat yo lwen bèt yo yon fason pou poupou chat pa al kontamine manje yo. Evite bay chat yo manje vyann kri ki ta ka genyen kis. Netwaye poupou chat la pi rapid ke posib, parazit la komanse danjre nan poupou apati youn pou rive senk jou. Nan tout ka kontaminasyon yo, maladi a pran youn a twa semèn pou l deklare lakay moun. Lè vyann nan byen kuit ak lè li konseve nan frizè anba -18 degre Sèlsiyis, parazit la mouri.
Referans
- Toxoplasmose, 2024. Centre Canadien d’Hygiène et de Sécurité au Travail. https://www.cchst.ca/oshanswers/diseases/toxoplasmosis.html
- Toxoplasmose, 2024. Gouvernement du Québec. https://www.quebec.ca/agriculture-environnement-et-ressources-naturelles/sante-animale/maladies-animales/liste-maladies-animales/toxoplasmose
- Toxoplasmose, 2024. VIDAL. https://www.vidal.fr/maladies/systeme-nerveux/toxoplasmose.html
Comments
Post a Comment