« Centre de l’information sur l’eau » di nou gen plizyè mwayen pou trete dlo. Genyen tretman fizik (tankou itilizasyon filtè, paswa, osmoz envès…), fiziko-chimik (tankou metòd kowagilasyon-flokilasyon…), chimik (avèk itilizasyon klò), biyolojik (avèkitilizasyon kèk bakteri). Itilizasyon youn oswa lòt metòd yo depann pa egzanp de mwayen ki disponib yo (materyèl, lajan…), kantite dlo pou trete a avèk finalite itilizasyon dlo a.
Emmanuel E. nan etid li te fè nan lane 2002 an Ayiti, te fèkonnen sèl mwayen chimik ki itilize pou trete dlo kri sitou nan milye riral yo se klò. Men klò a pa pi bon tretman akoz lè moun respire li li kapab ba yo pwoblèm nan poumon epi lè li melanje ak kèk matyè òganik ki konn nan dlo, li kapab lakoz maladi kansè.
Jasen J. B. nan lane 2023 nan zòn Laplèn, pi presizeman Kwadèmisyon ak Damyen, te etidye kèk posibilite tretman dlo ak mwayen ki disponib nan anviwònman moun yo ap viv la.Youn nan posibilite ki egziste pou trete dlo yon fason ki natirèl san nesesite pil resous ak lajan, se nan yon bò plant yo (a kondisyon plant sa yo pa toksik) epi nan yon lòt bò sab ak gravye (nan konpozisyon yon filtè). Travay Jasen J. B. a se yon konbinezon metòd fizikochimik (avèk plant Moringa oleifera) ak fizik (avèk filtè) ke yo abitye itilize nan pwosesis tretman dlo. Travay se te fè nan objektif pou l te pwopoze yon sistèm tretman dlo aksesib epi a ba pri.
Nou jwenn Moringa oleifera anpil kote an Ayiti, yo abitye releli Doliv osinon Gabriyèl. Yo itilize fèy la ak rasin lan nan manje, yo itilize grenn nan pou fè luil. Mutheeswaan S. (2011) di nou akoz potansyalite Moringa oleifera a yo itilize li nan pwogram pou konbat malnitrisyon nan peyi Senegal, End, Benen ak Zimbabwe. Malgre tout itilite sa yo, pi gwo kalite plant sa retenan fason li trete dlo.
Foto 1.- Grenn Moringa oleifera. Sous : bol.com
Pwosede yo itilize Moringa oleifera ladan li pou trete dlo a rele kowagilasyon-flokilasyon. Lè nou kite yon dlo sal poze nan yon bokal, nou remake apre yon ti tan tout salte yo al chita nan fon bokal la. Nan tretman gwo kantite dlo, salte yo ka pran plizyè jou avan yo poze kidonk avan dlo a klè. Enben pwosesis kowagilasyon - flokilasyon an fè travay transfòmasyon dlo twoub pou vin tounen dlo klè a pi rapid. Nan yon konsiderasyon nan domèn chimi, salte sa yo ki nan dlo a genyen yon chaj negativ. Ebyen lè yo mete kowagilan ki gen yon chaj pozitif nan dlo sal la, vin genyen yon ekilib ant chaj pozitif yo ak chaj negatif yo, se pou sa yo pale de kowagilasyon. Epi menm jan de moso leman ki genyen yon chaj diferan atire youn lot, eleman negatif ki nan salte yo al kole ak eleman pozitif ki nan kowagilan. Lè yo kole konsa, yo vin fè de boul yo rele flokon e se poutèt sa yo rele fenomèn sa flokilasyon. Lè pwosesis kowagilasyon - flokilasyon an fini, li vin pi fasil pou filtre dlo a.
Foto 2.- Kowagilan. Laboratwa Syans ak Teknoloji Alimantè. Jean Baptiste Jasen - 2023
Foto 3.- Dlo apre tretman ak Moringa oleifera (agoch)
fas a dlo kri (adwat). Laboratwa Syans ak Teknoloji Alimantè. Jean Baptiste Jasen - 2023Nan pwosesis tretman dlo a, anplis Moringa oleifera Enjenyè Agwonòm Jasen te itilize yon filtè. Pou li te fè filtè sa, li te itilize yon galon plastik ble, 18.9 lit. Li te pèse plizyè ti tou (chak tou te gen yon dyamèt 2 milimèt konsa) nan bouchon galon an epi li te koupe bouda a. Li te mete galon an tèt anba sou yon trepye epi li te mete ladan li 5 santimèt gravye, 5 santimèt gwo sab, 20 santimèt sab fen, 5 santimèt chabon epi 5 santimèt gwo sab. Li te rele yon espas 10 santimèt vid anlè melanj lan. Se nan espas sa a dlo pou filtre a ap chita.
Foto 4.- Filtè. Laboratwa Syans ak Teknoloji Alimantè. Jean Baptiste Jasen - 2023
Pou evalye kalite itilizasyon Moringa oleifera ak filtè nan tretman dlo a, de faktè te konsidere : kalite fizik/chimik dlo a epi kondisyon mikwobiyolojik li. Nan kad travay sa a, nou ap sèlman detaye rapò sou rezilta kondisyon mikwobiyolojik yo.
Foto 5.- Dlo apre tretman ak Moringa oleifera (agoch)
fas a dlo apre filtraj (adwat). Laboratwa Syans ak Teknoloji Alimantè. Jean Baptiste Jasen - 2023
Pou kondisyon mikwobiyolojik la, twa kategori mikwo-òganis te konsidere : kolifòm fekal, kolifòm total ak Escherichia coli.
- Prezans E. coli nan dlo endike yon kontaminasyon dlo a ak poupou. E. coli nan kèk ka ka lakoz dyare, vant fè mal, pwoblèm respiratwa.
- Kolifòm fekal yo se mikwo-òganis ki soti nan matyè fekal moun oswa bèt. E. coli se yon kolifòm fekal.
- Kolifòm total yo se mikwo-òganis yo jwenn tout kote nan anviwònman an, sa vle di nan tè, nan dlo, sou plant, nan kò bèt elatriye.
Rezilta :
- Nan ka dlo ki soti nan foraj la, kowagilan ak Moringa oleifera te pèmèt elimine 95% kolifòm fekal yo. Tretman total la te pèmèt yon eliminasyon 99.7%. Nan ka Escherichia coli a, chif sa yo te varye ant 68.4 % rive 94.7 %. Alòke pou kolifòm total yo, to a nan yon nivo ba anpil : 4 pou rive 5.8%.
- Nan ka dlo rivyè a, pou kolifòm fekal yo rezilta yo se 85.88 % ak 88.8%. Rezilta Escherichia coli yo pi etonan toujou. Itilizasyon Moringa oleifera te pèmèt sèlman yon eliminasyon 0.5%, men filtè a ta pral elimine tout mikwo-òganis yo nèt. Pou kolifòm total yo, rezilta yo pi favorab pase nan ka dlo foraj la, yo se 13.54% ak 18.75%.
- Pou dlo pi a, ak de faz tretman yo, 20 pou rive 48 % kolifòm fekal te elimine, epi 72.75 pou rive 78.75 % Escherichia coli. Tretman ak Moringa oleifera pa t pèmèt elimine okenn kolifòm total, men filtè a te pèmèt elimine 28.75% nan yo.
Rezilta yo yon fason jeneral montre yon bon randman nan eliminasyon Escherichia coli ak kolifòm fekal yo. Akoz kolifòm total yo varye anpil, kidonk divès orijin, divès fòm ak konpozan, nou ka konprann fèb to eliminasyon yo. Nan rezilta total sa a, efikasite Moringa oleifera pou kolifòm fekal yo ak Escherichia coli te rive atenn an mwayèn 46% kote to pa filtè a te sèlman 12.24%.
Pou faktè fiziko-chimik, analiz yo montre ke yon fason jeneral, tretman ak Moringa oleifera a pèmèt faktè sa yo rete nan limit Oganizasyon Mondyal Lasante etabli.
An rezime, otè a di nou ke itilizasyon Moringa oleifera ak filtè a poukont yo pa rann dlo a potab. Men, malgre tou, yo elimine matyè òganik ak bakteri dlo a, yon fason pou lè dlo sa a dezenfekte ak klò, li pa reprezante yon danje. Travay sa a kontinye louvri chemen sou posibilite pou tretman dlo an Ayiti sitou nan zòn rekile yo, ki gen anpil bezwen, ki toujou vilnerab fas a kèk maladi tankou kolera men ki pa gen gwo aksè ak enèji ni lopital. Pou plis detay sou travay sila a, nou kapab refere nou a dokiman rechèch Jasen J. B. la ki titre « Etude de l’efficacité des tourteaux de Moringa oleifera suivis d’une filtration sur sable dans le traitement des eaux brutes ».
Referans :
- Centre d’Information sur l’Eau (CIEAU). Quels traitements sophistiqués pour rendre l’eau potable. [En ligne] [Consultée le 3 octobre 2023 à 11 : 42AM]. Disponible sur internet : URL:https://www.cieau.com/le-metier-de-leau/ressource-en-eau-eau-potable-eaux-usees/quels-traitements-sophistiques-pour-rendre-leau-potable/
- Emmanuel E. et Lindskog P., 2002. Regards sur la situation des ressources en eau de la République d’Haïti. Actes du Colloque International réalisé à Port-au-Prince les 26, 27, 28 juin. Haïti. P 32-34
- Jasen Jean Baptiste, 2023. Etude de l’efficacité des tourteaux de Moringa oleifera suivis d’une filtration sur sable dans le traitement des eaux brutes. Mémoire de fin d’études, agronomie. Université d’Etat d’Haïti. Faculté d’Agronomie et de Médecine Vétérinaire (FAMV), Damien, Haiti, 96 p
- Mutheeswaan S., Pandikumar P., Chellappandian M., Ignacimuth S., 2011. Documentation and quantitative analysis of the local knowledge on medicinal plants among traditional siddha healers in Virudhunagar district of Tamil Nadu, India. Journal of Ethnopharmacology. 137 (1), 523-533
Comments
Post a Comment