Ti douv, gran douv

Foto 1.- Ka kontaminasyon Dicrocoelium dentriticum lakay yon kabrit femèl ki sòti Lestè. Abatwa kominal Kwadèmisyon. Félix Christ-Love 2022

Douv se yon parazit nou jwenn jeneralman kote ki gen ma dlo, marekaj ak zèb. Nou jwenn li lakay plizyè gwoup bèt men alafen se lakay bèt ki manje zèb yo li renmen rete. Genyen de kategori douv : ti douv, gran douv.

 

Ti douv la ki gen pou non syantifik Dicrocoelium dentriticum lakoz yon maladi yo rele dikwoselyoz. Sik devlopman Dicrocoelium dentriticum la se : kalmanson – foumi – bèt oswa moun (Leberegel, 2021). Nan ka Dicrocoelium dentriticum kanal yo ki mennen bil la parèt dilate epi li blanch. Lè ou pèse kanal yo, wap wè bil la parèt tou nwa epi wap wè tou vè Dicrocoelium dentriticum yo. Fwa parèt gonfle, epi se tankou li pouri avèk yon bann tach blanch sou li (Troncy, 1981).

Genyen de jiska twa kategori gran douv ki se Fasciola hepatica, Fasciola gigantica, Fascioloides magna. Nan travay sa, nap pale de Fasciola hepatica. Vè sa a lakoz yon lòt maladi yo rele fasyoloz. Sik devlopman Fasciola hepatica a se : limne (yon kategori bèt a kò mou san eskelèt) – zèb (sitou sila yo nou jwenn nan ma dlo yo tankou kreson) – zannimo oswa moun (Bensid, 2018). Nan ka Fasciola hepatica a, nou kapab remake de kis ki genyen yon pi vèt oswa chokola sou poumon an (Rozier et Tassin, 1992). Fwa anfle, li vin parèt sou li de tach wouj ki se siy emoraji ak de tach jòn oswa gri. Kanal yo ki mennen bil la dilate epi vin rèd (Bensid, 2018).

Sik devlopman parazit yo ede nou konprann tout bèt ak plant ki enplike nan simaye maladi sa a. Li fè parèt aklè tou risk enfestasyon ki genyen nan konsomasyon bèt ak plant sa yo.

Kèk sentom maladi sa yo se doulè nan pati ksifoyid la (sa nou abitye rele lakay nou biskèt la), difikilte pou respire, dyare. Lè maladi a fin ravaje bèt la nèt nou kapab remake li mèg anpil, li fèb, pwal/lèn li ap tonbe, kèk pati nan kò li tankou popyè li anfle (Titi, 2021). Men pi bon fason pou rive fè dyagnostik la lakay yon bèt vivan, se nan egzamen san ak poupou. Li enpòtan pou nou konnen ke depi yon sèl grenn bèt nan yon twoupo kontamine, li tou konsidere tout bèt nan twoupo a malad. Kote règ yo respekte, lè yo dekouvri yon kakas ki enfeste, yo jete fwaepi pafwa poumon an. Pou tretman maladi a lakay bèt yo, yo itilize antèlmentik sitou avan peryòd lapli. Kòm prevansyon, yo pa kite bèt yo bwè nan ma dlo sal epi yo pa kite yo tou manje zèb nenpòt ki kote.

Nou jwenn douv yo nan tout peyi sou planèt la e Ayiti pa fè eksepsyon. Nan ankèt Dr Jacques Blaise te fè ant 1992 ak 1993, sou senk abatwa li te ankete, de nan yo ki se abatwa zòn Disis ak Lestè te genyen bèf, kabrit ak mouton ki te enfeste ak parazit Fasciola hepatica la (Blaise, 2001). Nan lane 2022, Félix C. L. sou twa zòn li te ankete ki se Kwadèboukè, Titanyen, Lestè te vin konfime prezans Dicrocoelium dentriticum nan zòn Lestè. Efektivman, prezans douv yo toujou repete nan zòn sila a akoz pil marekaj ki genyen la.

Moun pi fasil trape maladi dikwoselyoz ak fasyoloz nan manje ze douv kidonk nan manje zèb (tankou kreson), foumi ki enfeste ak ze vè a. Nan ka dikwoselyoz la sentom yo lakay moun se gonfleman, gaz, epi pafwa konstipasyon, dyare epi gonfleman. Nan ka fasyoloz, pa genyen sentom jiskaske parazit la komanse anpil epi gaye nan kò a. Lè konsa, malad la kapab santi kèk twoub nan dijesyon (OSAV, 2021). Se nan egzamen san an yo kapab depiste enfestasyon douv lakay moun. Nan ka nou ta sispèk yon enfestasyon akoz yon douv, premye konsèy la se ale wè doktè pou yon depistaj epi swen ki nesesè.

Referans :

- Bensid A. 2018. Hygiène et inspection des viandes rouges. Edition Djelfa. Alger. Algérie. 988p.

- Blaise J., 2001. Prévalence et fréquence des lésions parasitaires du foie et du poumon des ruminants en Haïti. Revue Médecine Vétérinaire, 152.3, 269-274, 6p.

- Félix C. L., 2022. Étude de la prévalence des parasitoses larvaires et imaginales du foie et du poumon des petits ruminants au poste d’abattage communal de La Croix des Missions. Mémoire de fin d’études, agronomie. Université d’Etat d’Haïti (UEH). Faculté d’Agronomie et de Médecine Vétérinaire (FAMV), Damien, Haïti, 60 p

- Leberegel K., 2021. Douves : Dicrocoeliose/ Fasciolose. Office fédéral de la sécurité alimentaire et des affaires vétérinaires. Suisse.

- Office federal de la sécurité alimentaire et des affaires vétérinaires (OSAV), 2021. Douves : Dicrocoeliose / fasciolose. Confédération Suisse. Suisse. 3p

- Rozier J., Tassin P., 1992. Les lésions du poumon des bovins. Recueil de Médecine Vétérinaire. T168 (5), P363-370.

- Titi A., 2021. Parasitologie. [En ligne] [Consultée le 12 juillet 2022 à 4 : 30 PM]. Disponible sur internet : URL : https://fac.umc.edu.dz/vet/Cours_Ligne/cours_20_21/Parasitologie_A4/strongylose_des_petits_ruminants.pdf

- Troncy P., 1981. Précis de parasitologie vétérinaire tropicale. Paris. Institut d’élevage et de Médecine Vétérinaire des pays tropicaux. 717 p

Foto 2.- Lav Dicrocoelium dentriticum. Félix Christ-Love - 2022

Foto 3.- Lezyon Dicrocoelium dentriticum sou fwa kabrit femèl ki sòtè. Félix Christ-Love - 2022

Foto 4.- Ensizyon sou poumon yon kabrit femèl ki sòti Lestè avèk ekstraksyon lav Dicrocoelium dentriticum. Félix Christ-Love - 2022

Foto 5.- Foto total lav Dicrocoelium dentriticum Félix Christ-Love te dekouvri nan kakas yon kabrit femèl ki sòti Lestè nan abatwa Kwadèmisyon an 2022.