Sa nou manje anplis de sa yo pote pou ede kò nou grandi epi bannou enèji pou nou viv, kapab genyen gwo konsekans sou sante nou. Yon parazit oswa yon bakteri, yon polyan chimik tankou pestisid, eksè angrè, yon eleman fizik tankou yon limay paydefè kapab lakoz gwo dega sou sante nou. Imajine ki konsekans sa ta genyen si ou ta rive manje yon bout zong oswa yon moso paydefè ki pa pral degrade nan òganis ou. Imajine sitiyasyon yon astwonòt ki nan lespas a de milyon de kilomèt de latè epi ki ap soufri ak yon vant pase akoz yon move manje.
Eben se apre refleksyon sa yo, nan fen deseni 1960 lan, NASA (National Aeronautics and Space Administration) ta prale mete ansanm ak Pillsburg Company pou te analiz danje (kontaminan) ki kapab genyen nan manje astwonot yo ap manje epi detèmine limit pou pèmèt yo kontwole danje sa yo. Angwo se ta prale fondasyon HACCP (Hazard Analysis and Critical Control Point). Travay sou kontwòl kalite sa nap manje epi sitou sa ki ap pwodui (nan restoran, endistri agwo alimantè …) se tout yon pwosesis ki soti depi nan pwodiksyon latè oswa bè pase nan transfòmasyon pou rive jwenn konsomatè final la. E avèk mondyalizasyon, echanj enpòtasyon/ekspòtasyon ant peyi yo, chans pou maladi ak kontaminan simaye yo pa sispann ogmante. Kidonk enpòtans konesans ak aplikasyon prensip HACCP ak Food Safety ap parèt pi enpòtan chak jou. Se nan sans sa a, sou menm liy travay mwen nan kontwòl kalite aliman ak parazitoloji, mwen ranfòse spesyalizasyon sa a nan karyè mwen.
Comments
Post a Comment