Jen 2022, nan lopital Kanbera nan peyi Ostrali, yo jwenn premye ka Ascaris nan sèvo yon moun

Foto 1: Lav Ophidascaris robertsi vivan yo te dekouvri nan sèvo yon fanm 64 lane nan peyi Ostrali

Nan peyi Ostrali, nan lopital Kanbera, nan mwa jen 2022 pandan yon operasyon, kèk doktè ta prale dekouvri pou premye fwa yon vè vivan Ophidascaris robertsi, ki mezire 8 santimèt nan sèvo yon fanm 64 lane. Se premye fwa menm yo jwenn vè sa lakay moun. Yo jwenn li jeneralman lakay piton. Men madanm sa te fè konnen li pa janm manje sèpan nan vi li. Apre envestigasyon, yo ta pral aprann madanm sa te rete nan yon zòn ki gen anpil piton epi tou li ta pral di ke li abitye rekolte zèb nan nan zòn on lak pou li manje.

Premye sentom enfestasyon yo te parèt anviwon nan janvye 2021. Nan menm mwa sa a, madanm nan te ale lopital pask suivan sa l te di, depi twa semèn li tap soufri ak doulè nan vant, dyare, fyèv, tous epi li tap plede swe lannuit. Doktè yo te dekouvri li te soufri enfeksyon parazitè ak pwoblèm twoub nan san. Malgre li te rete sou siveyans medikal, madanm nan ta pral devlope yon lane apre lòt sentom tankou pèt memwa ak yon eta depresif. Gras ak egzamen IRM yo ta pral fè pou li, yo ta pral dekouvri li genyen tankou yon blesi nan pati fwon li anndan tèt li. Se sa ki ta pral fè yo fè nan mwa jen 2022 operasyon ki ta pral fè dekouvri vè Ascaris la. Se afòs vè a deplase nan kò malad la ki fè li rive nan sèvo li. 

Yo pa t fè lòt egzamen pou li pou yo te rive konnen si li genyen vè nan lòt pati nan kò li anko. Men, yo ba li medikaman epi yo kenbe ka sou siveyans akoz se premye fwa yap trete yon ka konsa.

Vè Ophidascaris robertsi a fè pati fanmi Ascarididae. Si vè sa parazite sèpan, nan menm fanmi Ascarididae a, nou jwenn lot espès vè ki parazite lot bèt tout tankou kochon, mouton, kabrit, elatriye. Dorcéus M. A. nan kolaborasyon ak Blaise J. epi Milien M. nan lane 1994, te soulinye prezans Ascaris lakay kabrit ak mouton an Ayiti. Félix an 2022, ta pral rekonfime prezans Ascaris ovis lakay kabrit ak mouton epi menm note yon ogmante nan nivo enfestasyon an. Siy kontaminasyon ak Ascaris lakay bèt yo angwo se apeti yo ki bese, tous, dyare. Pi bon fason pou w sètifye yon bèt gen Ascaris se nan analiz kaka bèt la ak nan analiz visè li yo tankou zo tèt li, sèvo l, tout pati ki anndan kaj torasik la. Men, jeneralman kèk mwa apre li enfeste, bèt la voye parazit la deyò nan kaka li. Se konsa, parazit la pral rive gaye kò li epi rekòmanse chèn kontaminasyon an.

 

Pou plis enfòmasyon, nap jwenn atik orijinal la nan jounal The Guardian sou tit: « Oh my God » : live worm found in Australian woman’s brain world-first discovery - nan dat 28 out 2023.

Foto 2: Imaj lezyon Ophidascaris robertsi nan sèvo madanm 64 lane a